អាជ្ញាធរត្រូវបន្តថែរក្សានិងពង្រឹងសន្តិភាពស្ថេរភាពនយោបាយសន្តិសុខសណ្តាប់ធ្នាប់សាធារណៈឲ្យល្អ

អភិបាលខេត្តកែប បានណែនាំដល់អាជ្ញាធរ ក្រុងស្រុក ឃុំសង្គាត់ យកចិត្តទុកដាក់ថែរក្សា និងពង្រឹងសន្តិភាព ស្ថេរភាពនយោបាយ សន្តិសុខសណ្តាប់ធ្នាប់សាធារណៈ ពង្រឹងការអនុវត្តគោលនយោបាយភូមិឃុំសង្គាត់មានសុវត្ថិភាព ពង្រឹងសេវាសាធារណៈ ពិសេសត្រូវឆ្លើយតប បំភ្លឺឲ្យបានទាន់ពេលវេលា នូវរាល់ព័ត៍មានក្លែងក្លាយ ព័ត៍មានដែលមានចរិតញុះញុងអុចអាល ពីពួកអគតិដែលប៉ុនប៉ងបំផ្លាញសន្តិភាព និងការអភិវឌ្ឍន៍។

ថ្លែងក្នុងពិធីប្រកាស លោក ឃន វុទ្ធី ឲ្យចូលកាន់តំណែងជាអភិបាលក្រុងកែប នៅថ្ងៃទី២២ ខែកក្កដា ឆ្នាំ២០២៤ នៅសាលប្រជុំសាលាក្រុងកែប ឯកឧត្តម សោម ពិសិដ្ឋ អភិបាលខេត្តកែប បានលើកឡើងថា នៅក្នុងនិតិកាលទី៧ នៃរដ្ឋសភា កម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដោយផ្តោតសំខាន់ទៅកិច្ចអភិវឌ្ឍន៍ប្រទេស និងលើកកម្ពស់ជីវភាពប្រជាពលរដ្ឋ ពិសេសប្រែក្លាយកម្ពុជា ជាប្រទេសមានប្រាក់ចំណូលធម្យមកម្រិតខ្ពស់នៅឆ្នាំ២០៣០។

ឯកឧត្តមអភិបាលបន្តថា ដើម្បីសម្រេចគោដៅនោះបាន ទាមទាឲ្យអាជ្ញាធរថ្នាក់ក្រោមជាតិ មានភាពរឹងមាំ ម្ចាស់ការ និងមានអភិបាលកិច្ចល្អ រក្សាបាននូវស្ថេរភាពនយោបាយ សន្តិសុខសណ្តាប់ធ្នាប់សាធារណៈល្អ ពិសេស រក្សា ការពារសន្តិភាពឲ្យបានដើម្បីធានាបាននូវការអភិវឌ្ឍន៍ លើកកម្ពស់លទ្ធិប្រជាធិបតេយ្យសេរីពហុបក្ស សិទ្ធិសេរីភាពរបស់ប្រជាពលរដ្ឋ និងការអភិវឌ្ឍសេដ្ឋកិច្ចសង្គម ។

ឯកឧត្តមអភិបាលខេត្តក៏បានណែនាំអាជ្ញាធរ មន្ត្រីជំនាញពាក់ព័ន្ធ កងកម្លាំងទាំងបី ត្រូវខិតខំប្រឹងប្រែងធ្វើការឲ្យកាន់តែប្រសើរ ហើយក្នុងនាមជាមន្ត្រីសាធារណៈ បម្រើប្រជាពលរដ្ឋ គឺគ្មានគិតថ្ងៃសៅរ៍ និងថ្ងៃអាទិត្យនោះទេ ពិសេសទូរស័ព្ទ ត្រូវបើកជានិច្ច២៤ម៉ោង លើ២៤ម៉ោង ដើម្បីងាយស្រួលទំនាក់ទំនងក្នុងករណីចាំបាច់ណាមួយ។ ឯកឧត្តមក៏បានណែនាំមេឃុំ ចៅសង្កាត់ មេភូមិ មេប៉ុស្តិ៍ និងប្រធានមណ្ឌលសុខភាព ឲ្យពង្រឹង ការផ្តល់សេវារដ្ឋបាល និងសេវាសាធារណៈផ្សេងៗឲ្យបានល្អ ពិសេសពង្រឹងការអនុវត្តគោលនយោបាយភូមិឃុំសង្កាត់មានសុវត្ថិភាពឲ្យកាន់តែល្អប្រសើរ៕