មន្ត្រីរាជការ និងប្រជាពលរដ្ឋខេត្តកែប រួមគ្នាដង្ហែរក្បួនអបអរសារទរ ក្រុងកែប ខេត្តកែប ទទួលបានពានរង្វាន់ស្ដង់ដារទីក្រុងទេសចរណ៍ស្អាតអាស៊ាន ឆ្នាំ២០២៤-២០២៦ និងទិវាជាតិទីក្រុងស្អាតលើកទី១២ ក្រោមប្រធានបទ «ទីក្រុងស្អាតដេីម្បីទេសចរណ៍៉ ឆ្នាំ២០២៤»

ក្រុងកែប ខេត្តកែប នៃព្រះរាជាណាចក្រកម្ពុជា បានទទួលពានរង្វាន់ស្តង់ដាទីក្រុងទេសចរណ៍ស្អាតអាស៊ាន ឆ្នាំ២០២៤-២០២៦ ពិធីប្រគល់ពានរង្វាន់នេះប្រព្រឹតទៅនៅថ្ងៃទី២៦ ខែមករា ឆ្នាំ២០២៤ ក្នុងវេទិការទេសចរណ៍អាស៊ានលើកទី៤ ឆ្នាំ២០២៤ នៅទីវៀងចន្ទ ប្រទេសឡាវ ។

ក្នុងទឹកចិត្តសាទរ រីករាយជាមួយជ័យលាភី ក្នុងនាមជាខេត្តពានរង្វាន់ ស្តង់ដាទីក្រុងទេសចរណ៍ស្អាតអាស៊ាន ឆ្នាំ២០២៤ នាព្រឹកថ្ងៃទី០២ ខែមីនា ឆ្នាំ២០២៤ នេះ ថ្នាក់ដឹកនាំខេត្ត ព្រះសង្ឃ មន្ត្រីរាជការ រួមទាំងប្រជាពលរដ្ឋ ក្រុមយុវជន និងសិស្សានុសិស្ស ជាច្រើនរយនាក់បានមកជួបជុំគ្នា ដង្ហែរក្បួនព្យុហយាត្រា អបអរសាទរ តាមដងវិថីសំខាន់ៗ ចាប់ពីសួនច្បារខ្ញុំស្រឡាញ់ខេត្តកែប ឆ្នេរលេងទឹក កាត់តាមដងផ្លូវ ៣៣A និង ៣៣ កាត់តាមទីប្រជុំជនផ្សារកែប ផ្សារដំណាក់ចង្អើរ ផ្សារសេះស និងផ្សាក្តាម ឆ្ពោះមកឆ្នេរលេងទឹកវិញ រួមទាំងការដង្ហែរតាមទូកទេសចរណ៍ស្របតាមបណ្តោយឆ្នេរទេចរណ៍សំខាន់ៗក្នុងខេត្តផងដែរ ។

ក្នុងពិធីជួបជុំគ្នា ឯកឧត្ដមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប បានអានសារលិខិត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកិតិ្តយស នៃគណៈកម្មាធិការជាតិវាយតម្លៃទីក្រុងស្អាត ក្នុងឱកាសទិវាជាតិទីក្រុងស្អាត លើកទី១២ ឆ្នាំ២០២៤ ដែលមានខ្លឹមសារជម្រុញចលនាប្រឡងប្រណាំង “ ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ” ដើម្បីអោយកម្ពុជាក្លាយជាគោលដៅទេសចរណ៍ ប្រកបដោយគុណភាព ចីរភាព ភាពស្អាត និងបៃតង និងភាពទាក់ទាញខ្ពស់សម្រាប់ភ្ញៀវទេសចរជាតិ និងអន្តរជាតិ សក្តិសមកិត្តិនាម “កម្ពុជា ព្រះរាជាណាចក្រអច្ឆរិយៈ ផ្តល់ភាពកក់ក្តៅ”។ បន្ថែមពីនេះឯកឧត្តមបណ្ឌិត អភិបាលខេត្តបញ្ជាក់ថា ជ័យលាភីថ្មីដែលខេត្តកែបនេះ កើតចេញអំពីកិច្ចខិតខំប្រឹងប្រែងរួមគ្នា របស់រដ្ឋបាលខេត្ត និងមន្ទីរអង្គភាព ជុំវិញខេត្ត រួមទាំងប្រជាពលរដ្ឋ ព្រះសង្ឃ ស្ថាប័នឯកជនទាំងអស់ លើការសំអាតអនាម័យបរិស្ថាន ការរៀបចំ ទុកដាក់សំរាមបានត្រឹមត្រូវ ទើបធ្វើអោយយើងនៅតែរក្សាបាននូវជ័យលាភីដ៏មានកិត្តិយសនេះ ។ ឯកឧត្តមបន្ថែមថា កន្លងមកខេត្តកែប ទទួលបានពានរង្វាន់ជាច្រើនដូចជា៖
-ពានរង្វាន់ទីក្រុងស្អាតផ្ការំដួលបីទង ៣លេីកជាប់គ្នា
-ពានរង្វាន់ទីក្រុងនិរន្តភាពបរិស្ថានអាស៊ាន នៅប្រទេសព្រុយនេ លើសូចនាករ ដីស្អាត ទឹកស្អាត និងខ្យល់ស្អាត
-ពានរង្វាន់ទីក្រុងទេសចរស្អាតអាស៊ាន នៅទីក្រុងឈាងម៉ៃ ប្រទេសថៃ
-វិញ្ញាបនបត្រទីក្រុងឈានមុខអាស៊ាន លើគោលដៅអភិវឌ្ឍប្រកបដោយចិរភាព ត្រូវទទួលនៅ ឆ្នាំ២០២០ នៅប្រទេសជប៉ុន តែត្រូវពន្យាពេលដោយសាវិបត្តិជំងឺកូវីដ-១៩
-ពានរង្វាន់ចលនាប្រឡងប្រណាំង ឆ្នេរខ្សាចកំសាន្តស្អាត របស់ក្រសួងទេសចរណ៍។
-វិញ្ញាបនបត្រនិរន្តរភាពបរិស្ថានអាស៊ាន លើសូចនាករ ខ្យល់ស្អាត
និងថ្ងៃនេះទទួលបានពានរង្វាន់ស្តង់ដាទីក្រុងទេសចរណ៍ស្អាតអាស៊ាន លើកទី៤ ឆ្នាំ២០២៤-២០២៦ ដែលធ្វើពិធីអបអរនាពេលនេះ។

ឯកឧត្តមអភិបាលខេត្ត បន្ថែមថា បណ្តាជ័យលាភីធំៗ ដែលកែបទទួលបានផ្ទួនៗគ្នានេះ គឺមកពីការយកចិត្តទុកដាក់ខ្ពស់ ពីថ្នាក់ដឹកនាំខេត្ត និងការចូលរួមយ៉ាងសកម្មពីបណ្តាមន្ទីរអង្គភាព មន្ត្រីរាជការ និងបងប្អូនអាជីវករ ប្រជាពលរដ្ឋ រួមគា្នក្នុងកិច្ចការអភិរក្ស និងអភិវឌ្ឍន៍ទីក្រុងរបស់ខេត្តកែប ចេញជាលទ្ធផលផ្លែផ្កា ដូចពេលនេះ ។ ជាក់ស្តែង សោភណភាព ហេដ្ឋារចនាសម្ព័ន្ធក្នុងខេត្ត មានការរីចំរើនគួរអោយកត់សំគាល់ ព្រៃឈើ សំណង់ អាគាររដ្ឋ អគារសាធារណៈ ផ្ទះសំណាក់ សណ្ឋាគារ រីស៊ត អាហារដ្ឋាន ភោជនីយដ្ឋាន ឆ្នេរសមុទ្រ សេវាម្ហូបអាហារសមុទ្រ និងទីតាំងល្អល្អ ទាំងអស់នេះសុទ្ធសឹងជាផ្នែកមួយជម្រុញអោយខេត្តឈានទទួលបានជ័យ លាភីក្នុងការប្រឡងប្រណាំងដណ្តើមបានពានរង្វាន់ជាបន្តបន្ទាប់។ ឯកឧត្តមសង្ឃឹម តាមរយៈជ័យលាភីនេះ ខេត្តកែប នឹងទាក់ទាញបានភ្ញៀវទេសចរជាតិ និងអន្តរជាតិ កាន់តែច្រើនឡើងថែមទៀត ធ្វើអោយខេត្តកែប ក៏ដូចជាប្រជាពលរដ្ឋក្នុងខេត្តកាន់តែមានសេដ្ឋកិច្ចរីកចំរើន និងកាន់តែមានការអភិវឌ្ឍន៍បន្ថែមទៀត៕a